【文：阿悅媽】
這個四月份，是阿女小一的悠閒月，只有三分一日子要返學，其中還包括外出活動和復活節派對日。聽落，好似仲係幼稚園咁！平時功課已經唔多，考試又冇乜壓力。我見到阿女返學返得開心，我都好羨慕。如果我地以前有得咁就好啦！
另一邊又會換來回應一句，咁玩法，第時點考公開試？
無錯！呢個位，想信係好多家長的掙扎位！我想我個細路健康快樂就夠，但係最好就第時讀書好少少，份工好少少，嫁得好少少……每樣少少，其實我地已經好多要求！
父母唔想攞仔女的將來博一鋪，所以寧多莫少，學多啲，識多啲，練習多啲……但係，其實父母都假設咗佢地嘅小朋友係可以谷的。
作為一個師奶、阿媽，我覺得我條師奶數係咁計嘅：
作為一個師奶、阿媽，我覺得我條師奶數係咁計嘅：
假設我阿女有80歲命，如果我狂谷佢，一個唔好彩，谷到佢抑鬱，谷到佢索 K ，谷到佢反叛而唔理我！咁佢之後嘅人生，唔知可唔可以變番開心快樂。同時，佢係未必讀到書！咁，佢人生80年，可能得2至3年（由出世到入幼稚園之前）係快樂的。
又如果我狂谷我個女，而好好彩佢冇抑鬱自殘，只係谷唔起，成績一般。咁，我唔擔保佢之後嘅人生有會否快樂，但佢嘅童年一定唔會太快樂！佢嘅童年係用咗嚟達到父母基本要求，一定好勞累。咁即是佢人生80年，最少3歲至18歲（足足15年）都係唔快樂嘅。
好啦，我好彩，個女俾我狂谷，又谷到，讀到書，有份好工，前途一片光明……但係其實我都係唔擔保佢咁就一定係快樂喎！可能佢位高權重好大壓力喎！同時，由於佢細個俾我谷，佢3歲至大學或碩士又或博士畢業前，都應該冇乜時間有快樂，即係人生頭嗰廿幾三十年都係冇快樂嘅。
所以，我認為呢，我既然唔確定我個女谷唔谷到，為咗唔想佢有童年抑鬱，自殺，我應該先俾佢一個快樂的童年生活先，暫時目標係快樂小學生活，咁起碼，佢80歲嘅人生，一定有12年係快樂嘅！之後萬一生活壓力太大，都可以回憶一下兒時的快樂，當老本慢慢搣。總好過所有回憶總是痛苦的，灰灰的。
如果阿女他日原來讀書都讀到多少少，份工又係適合佢多少少，又嫁到個老公對佢好少少……咁阿女又再快樂多少少囉！
阿女，希望你明白阿媽條師奶數，我覺得咁先係最保本的快樂人生。所以，他日你唔好怪阿媽想當年點解冇谷你，我條數係咁計嘅！:)
你好。雖然我沒小朋友。但也感受到你好有智慧。祝您小朋友快高長大。健康
回覆刪除