用把口看電影的人

http://hkm.appledaily.com/detail.php?guid=18817820&category_guid=vice&sup_id=12187389&category=daily&issue=20140801





用屁股思考的人可怕，用把口看電影的人，可惡。


最最不能被騷擾的，首推色情電影。很簡單，有無人做愛時，會突然問對手「係喎雪櫃條魚有無拎出嚟解凍啊？」那天看《愛的放題》，身旁觀眾全程無停口。

看笑片，最怕是哄堂大笑之際，旁邊的人拉你衣袖「笑乜？有咩咁好笑？」解釋一個笑話和人大釋法同樣難頂。

看荷里活大片較不怕騷擾，反正都是打到拆天爛地，我試過遲到半個鐘入場睇一齣荷里活片，結果完全無影響馬上入局跟到完場，那齣電影是《變形金剛4》。

看恐怖片如果被人騷擾，那的確是很恐怖的事。

看張家輝《盂蘭神功》，片首雖未入正題，但已逐步營造緊張陰沉氣氛，誰知身邊一對男女，卻當自己是導演和影評人，對銀幕上每一格菲林每一個動作，都有回應。你知道甚麼叫「每一個動作都有回應」嗎？譬如，張家輝和家人吃飯，人家吃得好端端的，他回應一句：「都幾好餸喎」；吳家麗上台唱戲，他回應一句：「個台邊有咁細㗎，我地樓下個戲台都大過佢啦，係咪啊老婆。」張家輝遇到個頭會向後180度轉的女鬼，他大叫：「走啦傻佬仲望！鬼嚟㗎！」

戲是看不下去了，恐怖片要營造氣氛，把你帶入緊張狀態才出其不意嚇你一跳；那位觀眾講波佬上身每事描述搭嘴，鬼都驚咗你。

「呢齣係韓國定日本電影？哦，六本木，係日本嚟㗎。嘩，無對白嘅，搞乜啊？唔係啩，全程睇幾條友坐係間屋度？唉，唔知想做乜。慘啦，無劇情，唉弊啦，你當我膚淺我真係get唔到……」

我很想對他說：「阿叔，你直接話你想睇AV但睇唔到想回水好過啦！」




曾志豪