私煙效顰

http://hkm.appledaily.com/detail.php?guid=18776042&category_guid=vice&sup_id=12187389&category=daily&issue=20140626


上個月澳門發動遊行要求取消離補法案，有行家致電：「喂，有無澳門良心的電話？」
我罵了一句：「時運高，無呢啲賤人電話。」

行家呆了問：「點解你話佢係賤人呢？」

我沒好氣：「澳門良心，咪同嗰啲愛香港啊、幫香港嗰啲一樣，仲唔係賤人？」

行家弱弱的說：「呢個澳門良心，係真係有良心㗎，就係佢地搞遊行圍政府㗎。」

大佬，你真係唔怪得我囉！我是活在每天都被一些自稱「愛香港」其實是「害香港」、「幫香港出聲」其實係「幫阿爺出聲」的黑白不分、是非顛倒的瘋狂世界，我一聽到「良心」兩個字，只會想起「過百萬人收睇」的電視台囉。

香港正面臨這種被廉價複製一些本來偉大正面價值觀的危險時代，結果卻是扭曲了這些美好事物的意義。

正如「Gathering」已經等同「廁震」，大家寧願做孤獨精都不敢Gathering；今時今日，誰還敢高呼「愛香港」？道德高地被小丑霸佔，讓人以為，愛香港便是蠻不講理紅衛兵上身。

最近連絕食都俾人搞埋！看見李私煙海棠春睡的絕食相片，聽到她說「也許我倒下再也不起來」，我很想說：「如你所願」。絕食慘被複製，甘地都會激到彈起身。

89學生絕食，是為了爭取民主；美國有母親絕食，是為了反戰。古今中外的絕食，都是弱勢人民向權力機關爭取權益。

今天私煙絕食，居然是要求政府強硬對付民眾的佔中！你下次會否絕食，要求強拆東北？再絕食，要求驅趕中華白海豚？絕食要求梁振英連任？

古有「東施效顰」，今有「私煙效顰」。絕食的力量，是喚起社會大眾的同情；但私煙絕食，只會喚起大家的「同意」：好啊，你夠膽就唔好食，直至永遠，阿門。


曾志豪